Islamic Blog

Islamic Updates




Dua

Dua e Maghfirat aur Eisaale Ṡawaab ka bayaan

Musalman apne dusre marhoom musalman ki maghfirat ke liye do cheez kar sakta hai :
[1] Marhoom ke liye Dua e Maghfirat kare.
[2] Koi neki karke is usko Eisaale Ṡawaab kare.
Mayyat ke liye Dua e Maghfirat aur Eisaale Ṡawaab karne se ALLĀH ke fazl aur rahmat se mayyat ko qabr me raahat hoti hai, us ke darjaat buland hote hain aur usko amn o sukoon milta hai.
Agar woh aam musalman hai aur agar gunaah ki wajah se us ko azaab ho raha hai to us ka azaab kam hoga. Aur agar woh Auliya Allāh hai ya nek banda hai to us ke darjaat buland hote rahenge.
****************
[1] Dua e Maghfirat :
Mayyat ki bakhshish ke liye dua karna.
Rabbana ighfir lana walil ikhwaanina al-lazeen sabaqoona bil-eimaani
[Tarjuma : Aye hamare Rabb! Hame ma’af farma aur hamare hum zaat biraadaro ko jo log hum se pehle guzre eimaan ke saath.]
Allāhumm-ghfir lahu wa rafa’a darajatahu fil mahdiyyeen wakhlufhu fee aqibihi fil ghaabireena , waghfir lana wa lahu yaa Rabbal aalameen, wafsah lahu fee qabrihi wa nawwir lahu feehi.
[Tarjuma : Aye ALLĀH! Ise ma’af farma aur hidayat yaafta logo me iske darja buland farma aur baaqi logo me iska jaanasheen muqarrar farma, Yaa Rabbal aalameen! Hume aur isko bakhsh de aur iski qabr me iske liye qushaadgi ata farma aur iske liye roshni ata farma.]
Hadeeṡe Nabawi :
(1) Hazrate Abu Huraira radiy-Allāhu ta’ala anhu se riwaayat hai ki :
Huzoor Rasool-Allāh sallallāhu alaihi wa sallam ne irshaad farmaaya
“Insaan jab mar jaata hai to us ke aamaal ka silsila khatm ho jaata hai [rook jaata hai], Magar 3 cheezen baaqi rehti hain :
[1] Sadqa e Jaariya [woh amal jis ko ek baar karne ke baad us ka ṡawaab use milta rehta hai jab tak woh cheez maujood rehti hai],
[2] Ilm jis se log faa’ida uthaayen,
[3] Nek aulaad jo waalidain ke liye Dua e Maghfirat kare.”
(2) Huzoor Rasool-Allāh sallallāhu alaihi wa sallam ne irshaad farmaaya,
“ALLĀH ta’ala jannat me kisi bande ke Darjaat buland karega to woh arz karega : Aye ALLĀH, Yeh darja kaise buland hua? ALLĀH ta’ala farmaega : Teri aulaad ne tere liye Dua e Maghfirat ki.”
(Bukhari, Adab-ul-Mufrad, Safa -30;
Ibne Maajah, Safa -268;
Mishkaat, Safa -198;
Suyuti, Sharh-us-Sudoor, Safa -127;
Tabaraani, Muajam-ul-Awsat, Jild -5, Safa -349)
[2] Eisaale Ṡawaab :
Koi nek amal [kalma ya zikr, tilaawat e Qur’ān majeed, Durood shareef, namaaz, roza, saqda-khairaat, hajj, umrah, tawaaf, qurbaani karke is mayyat ko Ṡawaab pahunchaye.
Hadeeṡe Nabawi :
(1) Hazrate Anas radiy-Allāhu ta’ala anhu ne arz ki “Hum apne murdo ke liye duaen, sadqaat o khairaat aur hajj karte hain to kya ye cheezen unhe pahunchti hain?”
Huzoor Rasool-Allāh sallallāhu alaihi wa sallam ne irshaad farmaaya “Haan, zaroor pahunchti hain aur wo unse aise khush hote han jaise tum ek dusre ke hadiye se khush hote ho.”
(Musnad Ahmad)
(2) Hazrat Uqba ibne Amir radiy-Allāhu ta’ala anhu se riwaayat hai ke
Huzoor Rasool-Allāh sallallāhu alaihi wa sallam ne irshaad farmaaya,
“Beshak sadqa qabr waalo ki quboor ki aag ko bujha deta hai.”
(Tabaraani;
Suyuti, Sharh-us-Sudoor)
(3) Hazrat Abdullah ibne Umar radiy-Allāhu ta’ala anhu se riwayat hai ke
Huzoor Rasool-Allāh sallallāhu alaihi wa sallam ne irshaad farmaaya,
“Jab koi nafl sadqa kare aur use apne waalidain ki taraf se kare to uske waalidain ko uska ajr milta hai aur us ke ajr me koi kami nahi hoti.”
(Tabaraani, Mu’ajam-ul-Ausat;
Suyuti, Sharh-us-Sudoor;
Suyuti, Jaami-ul-Sagheer;
Kunz-ul-Ummal;
Mukaashafatul Quloob)
(4) Ummul mo’mineen Aa’isha Siddeeqa radiy-Allāhu ta’ala anha se riwayat hai ki
Ek shakhs ne Rasool-Allāh sallallāhu alaihi wa sallam se puchha ke “Meri maan ka achaanak inteqaal ho gaya aur mera khayaal hai ki agar unhe baat karne ka mauqa milta to woh kuchh na kuchh khairaat karti. Agar main unki taraf se kuchh khairaat karu to kya unhe is ka ṡawaab milega?”
Aap sallallāhu alaihi wa sallam ne farmaaya “Haan milega.”
(Bukhari , Jild -23, Hadeeṡ -470)
(5) Hazrate Sa’ad bin Ubada radiy-Allāhu ta’ala anhu se riwayat hai ki
Maine Huzoore akram sallallāhu alaihi wa sallam se arz ki “Meri maan ka inteqaal ho gaya hai, unke liye kaun sa sadqa afzal hai?” Huzoor Rasool-Allāh sallallāhu alaihi wa sallam ne irshaad farmaaya “Paani.” Hazrate Sa’ad ne kuvan khudwaaya aur Huzoor Rasool-Allāh sallallāhu alaihi wa sallam ne farmaaya “Yeh kuwan Sa’ad ki maan ka hai.”
(Abu Daawūd, Jild -2, Kitaab-ul-Zakaat, Safa -180, Hadeeṡ -1681)
(6) Hazrat Ibn Abbaas radiy-Allāhu ta’ala anhu se riwayat hai ki
Ek aurat ke waalid ka inteqaal baghair hajj kiye ho gaya. Us ne Huzoor Rasool-Allāh sallallāhu alaihi wa sallam se apne waalid ke baare me puchha to Aap sallallāhu alaihi wa sallam ne farmaaya “Tum unki taraf se hajj karo.”
(Sunan Nasa’i, Jild -2, Hadeeṡ -545)
(7) Huzoor Rasool-Allāh sallallāhu alaihi wa sallam ne irshaad farmaaya,
“Apne waalidain me se kisi ka intiqaal ho jaaye to unko dafnaane ke baad unki qabr ke qareeb baithkar itni der tak ALLĀH ta’ala ka zikr karo ke jitni der me ek oont zubah karke taqseem kiya jaaye. Kyun ki dafn karne ke baad mayyat is tarh pareshaan hoti hai jaise koi samundar ki lahero ke bich doob raha ho. Jazb zikr kiya jaata hai to mayyat khush hoti hai ke meri aulaad ne mera haq ada kar diya.”
(8) Huzoor Rasool-Allāh sallallāhu alaihi wa sallam ne irshaad farmaaya,
“Koi shakhs Qabrastan me 11 martaba Soorah Ikhlaas [Qul huwallāhu ahad] padhkar tamaam Ahle quboor ko eisaale ṡawaab kar de to eisaal e ṡawaab karne waale ko sab ke barabar ajr karne milega.”
(Kashf-ul-Ghafa, Jild -2, Safa -371, Hadeeṡ -2629)
****************
Murde apni qabro me 7 din tak aazma’ish me hote hain Asahaaba in dino murde ki taraf se khaana khilaane ko mustahab jaante.
(Suyuti, Sharh-us-Sudoor, Safa -132)
Hazrat Shaikh Muhiy-ud-deen ibne Arabi rahmatullāhi alaihi ek da’awat me tashreef le gaye. Waha ek naujawaan bhi maujood tha. Aap ne dekha ki khaana khaate khaate woh achaanak rone laga. Wajah puchhne par usne bataaya ki “Bazariye Kashf mujhe ma’aloom hua hai ki farishte meri maan ko azaab dene waale hain.” Aap farmaate hain “Mere 70000 Kalma-e-Tayyiba padhe hue the. Maine dil hi dil me uski maan ko eisaale ṡawaab kar diya. Woh ladka foran muskuraane laga. Maine sabab puchha to kaha ke: Maine abhi dekha ki farishte meri maan ko jannat ki taraf le jaa rahe hai.”
(Mirqat-ul-Mafaatih, Jild -3, Safa -222, Hadeeṡ -1142)
****************
ALLĀH ta’ala us ke Habeeb sallallāhu alaihi wa sallam ke sadqe me
Sab ko mukammal ishqe Rasool ata farmae aur Sab ke Eimaan ki hifaazat farmae aur Sab ko musalmano ke liye Dua e Maghfirat aur Eisaale Ṡawaab karne ki taufiq ata farmae aur Sab ko Qabr me aur Mehshar me amn ata farmae.
Aameen.
Aafreen Seikh is an Software Engineering graduate from India,Kolkata i am professional blogger loves creating and writing blogs about islam.
Latest posts by Aafreen Seikh (see all)
Aafreen Seikh is an Software Engineering graduate from India,Kolkata i am professional blogger loves creating and writing blogs about islam.