Aap ki wilaadat 380 Hijri me Gurgan (Iran) me hui.
Aap ke waalid ka naam Ali ibn Abdullāh hai.
****************
Aap kaashif-e waaqia-e mureedeen the.
Hazrat Daata Ganj bakhsh Ali al-Hujweri rahmatullāhi alaihi bayaan farmaate hain ke ‘Ek martaba main Hazrat Abul Qaasim Gurgani rahmatullāhi alaihi ki khidmat me haazir tha aur apne mushaahida aur kashf ke baare me bata raha tha taake jaan saku ke kya Hazrat ne bhi in sab ko mehsoos kiya hai ya nahi. Hazrat tawjjoh ke saath sama’at farma rahe the. Jawaani ke josh aur maghroori ke aalam me mujhe ye khayaal aaya ke shaayad apne shaagirdi ke daur me Hazrat ne ye sab mehsoos nahi kiya hoga warna meri taraf itni tawajjoh na farmaate ya phir Hazrat mere baatini haal ke baare me jaanch kar rahe hain.
Hazrat ne mere is khayaal ko jaan liya aur foran farmaaya ke ‘Dost! Tumhe ye jaan lena chaahiye ke meri tawajjoh ya inkasaari tumhare liye ya tumhare is haal ke sabab nahi hai balke us ki qudrat ki taraf hai jis ne tumhe ye mushaahida aur kashf ata farmaaya hai. Ye sab sirf tumhare liye khaas nahi hai balke tamaam taalibaan ke liye hota hai.’ Ye sunkar main khaamosh ho gaya. Mera ye haal dekhkar Hazrat ne farmaaya ‘Bete! Insaan ko tasawwuf ki raah se mazeed ta’alluq nahi hota siwa e is ke ke wo jab wo is se judta hota hai to use lagta us ne ise paa liya hai aur jab wo is me se baahar aata hai to apne tasawwur ko lafzo ka libaas pehnaata hai. Is liye tardeed ya tasdeeq ye sirf tumhara tasawwur hai. Insaan tasawwur ki qaid se baahar nahi nikal sakta. Ye us par darwaaze par khade ghulaam ki tarah laazmi hai aur use har nisbat se door karta hai siwa e insaaniyat aur taabedaari ke.’
Is ke baad maine Hazrat ke saath Tasawwuf ke baare me bahot saari guftagu ki lekin agar main Hazrat ki be-misaal aur khaas roohaani taaqat se aage badhne ki koshish karta to main na-kaam hota.’
****************
Hazrat Daata Ganj bakhsh Ali al-Hujweri rahmatullāhi alaihi ne ek martaba aap se arz kiya ‘Huzoor! Durwesh ke liye kam e kam kitni cheezen zaroori hai ke jis se wo Faqr haasil kar sake?’
Aap ne irshaad farmaaya ‘Ek durwesh ko kam se kam 3 baato ka ilm hona zaroori hai : (1) Use sahi tareeqe se pevand lagaana aana chaahiye, (2) Use sahi tareeqe se sunna aana chaahiye, aur (3) Use sahi tareeqe se zameen par qadam rakhte aana chaahiye.’
Phir in baato ka khulaasa karte hue bataaya ke ‘Sahi pevand lagaane se muraad ye hai ke pevand jab lagaaye to faqr ke liye (ya’ni dunyawi cheezo ki laalach ko tark karne ke liye) lagaaye, dikhaawe ke liye nahi. Agar faqr ke liye pevand lagaaya gaya ho to wo sahi hai agarche sahi tareeqe se lagaaya na gaya ho.
Aur sahi tareeqe se sunne se muraad ye hai ke tawajjoh ke saath baatini taur par (ba-haal) sune, sirf dikhaawe ke liye ya ghuroor ke saath nahi, aur jo sune us par ikhlaas aur tawajjoh ke saath amal kare aur use zindgi bhar apnaaye sirf kisi kaam ya khaas mauqe ke liye nahi.
Aur sahi qadam se muraad ye hai ke hamesha neki ki taraf qadam uthaaye, fuzul kaamo ke liye nahi.’
****************
Aap ki likji hui mash’hoor Kitaab :
Fusool ul-Tareeqah wa Fusool ul-Haqeeqah.
****************
Aap Hazrat Shaikh Abu Usmaan Saeed al-Maghribi rahmatullāhi alaihi ke mureed aur khalifa hain (jo Junaidi silsila ke shaikh hain).
Hazrat Khwaja Abul Hasan Kharaqani ne aap ko Uwaisi tareeqe se khilaafat ata farmai hai.
Aap ke khulfa :
(1) Shaikh Abu Ali al-Faarmadi rahmatullāhi alaihi
(2) Sayyed Ali al-Hujweri urfe Daata Ganj bakhsh rahmatullāhi alaihi (Lahore)
(3) Shaikh Abu Bakr an-Nassaaj rahmatullāhi alaihi
(4) Khwaja Ali al-Hallaaj rahmatullāhi alaihi
(5) Shaikh Abu Bakr Abdullāh al-Tusi rahmatullāhi alaihi.
****************
Aap ka wisaal 23 Safar 450 Hijri (19/20 April 1058 A.D.) ko hua.
Aap ka mazaar Torbat-e-Heydarieh ke qareeb Gurgan (Iran) me hai.
****************
ALLĀH ta’ala us ke Habeeb sallallāhu alaihi wa sallam ke sadqe me
Aur Hazrat Khwaja Abul Qaasim Gurgani rahmatullāhi alaihi aur tamaam Auliya Allāh ke waseele se
Sab ko mukammal ishq e Rasool ata farmae aur Sab ke Eimaan ki hifaazat farmae aur Sab ko nek amal karne ki taufiq ata farmae.
Aur Sab ko dunya wa aakhirat me kaamyaabi ata farmae aur Sab ki nek jaa’iz muraado ko puri farmae.
Aameen.
- शब ए बारात की रात में क्या पढ़े | 2022 शब ए बरात का रोज़ा कब रखते है | - 7th March 2022
- Shab-E-Barat Ki Fazilat (शाबान बरक़त वाली रात) - 5th March 2022
- शब ए बारात की नमाज और सलामत तस्बीह (हिंदी) - 5th March 2022
